អនុគមន៍អិចស្ប៉ូណង់ស្យែល&ឡូការីត

ចំណាត់ក្រុម ៖សិក្សាភាសាអង់គ្លេស

កញ្ជ្រោងនិងផ្លែទំពាំងបាយជូរ

17 ខែវិច្ឆិកា 2019 បញ្ចេញមតិ

រសៀលមួយមានសត្វកញ្ជ្រោងមួយក្បាលកំពុងតែដើរកាត់ព្រៃហើយវាបានប្រទះឃើញផ្លែទំពាំងបាយជូរមួយចង្កោមសំយុងចុះពីលើមែក។ វាបានគិតថាទំពាំងបាយជូរនោះអាចធ្វើអោយវាបាត់ស្រេកទឹក។ វាបានថយក្រោយពីរបីជំហានហើយលោតស្រវាផ្លែ ប៉ុន្តែវាមិនអាចចាប់ផ្លែទំពាំងបាយជូរនោះបានទេ។ កញ្ជ្រោងបានថយក្រោយពីរបីជំហានហើយព្យាយាមហក់ចាប់ផ្លែទំពាំងបាយជូរទាំងនោះម្តងទៀត ប៉ុន្តែវានៅតែមិនបានសម្រេចដដែល។ ចុងក្រោយវាបានបោះបង់ចោលហើយបានងើបមុខ វាឡើងហើយនិយាយថាផ្លែទំពាំងបាយជូរទាំងនោះប្រហែលជាជូរហើយ ហើយវាក៏បន្តដំណើរទៅមុខទៀត

វាមិនពិបាកទេក្នុងការស្អប់នូវអ្វីដែលអ្នកមិនអាចយកបាន។

ចំណាត់ក្រុម ៖សិក្សាភាសាអង់គ្លេស

សត្វលា និងអ្នកលក់អំបិល

14 ខែវិច្ឆិកា 2019 បញ្ចេញមតិ

អ្នកលក់អំបិលម្នាក់តែងតែឲ្យសត្វលារបស់គាត់លីបាវអំបិលទៅផ្សារជារៀងរាល់ថ្ងៃ។

នៅតាមផ្លូវទៅផ្សារពួកគេត្រូវតែឆ្លងកាត់ស្ទឹងមួយ។ ថ្ងៃមួយសត្វលាស្រាប់តែជំពប់ជើងដួលនៅក្នុងស្ទឹងហើយបាវអំបិលក៏បានធ្លាក់ចុះទៅក្នុងទឹកដែរ។ អំបិលរលាយនៅក្នុងទឹកដូច្នេះហើយបាវក៏ស្រាលដែលធ្វើឲ្យសត្វលា​​សប្បាយចិត្តណាស់។ បន្ទាប់មកសត្វលាក៏ចាប់ផ្ដើមប្រើល្បិចនេះជារៀងរាល់ថ្ងៃ។

អ្នកលក់អំបិលក៏ចាប់ផ្ដើមយល់អំពីល្បិចក៏នេះហើយបានសម្រេចចិត្តបង្រៀនមេរៀន​មួយដល់សត្វលានោះ។

ថ្ងៃមួយគាត់បានដាក់បានបាវក្រណាត់នៅលើសត្វលា។ ជាថ្មីម្ដងទៀត​សត្វលា​នៅ​តែ​លេង​​​ល្បិចដដែលៗដោយសង្ឃឹមថាបាវក្រណាត់នោះនឹងស្រាលដូចជាបាវអំបិល​ដែរពេលដែលធ្លាក់ចូលទឹក។ ប៉ុន្តែបាវក្រណាត់ដែលធ្លាក់ចូលទឹកវាធ្ងន់ពិបាកនឹងលី ហើយសត្វលានោះក៏បានទទួលរងការលំបាកជាខ្លាំងទម្រាំដល់ផ្សារ។

វាបានរៀននូវមេរៀននោះ។ ថ្ងៃក្រោយមកវាមិនដែលលេងល្បិចនោះទៀតទេ។ហើយអ្នកលក់អំបិលនោះក៏សប្បាយចិត្តដែរ។

មេរៀន

ពេលខ្លះភាពជោគជ័យរបស់យើងបានមកពីសំណាង ដូច្នេះអ្នកមិនអាចប្រើវិធីនេះដើម្បីបានភាពជោគជ័យជារៀងរហូតនោះទេ៕

ចំណាត់ក្រុម ៖ផ្សេងៗ, អានរឿងព្រេង

បុរសឆ្លាត

14 ខែវិច្ឆិកា 2019 បញ្ចេញមតិ

មនុស្សម្នាបានមករកបុរសដ៏ឆ្លាតម្នាក់ដើម្បីត្អូញត្អែអំពីបញ្ហាដដែលៗគ្រប់ពេលវេលា។ ថ្ងៃមួយបុរសឆ្លាតនោះបាននិទានឲ្យពួកគេនូវរឿងកំប្លែងមួយហើយគ្រប់គ្នាបានសើចយ៉ាងសប្បាយក្អាកក្អាយ។

ក្រោយមកពីរបីនាទីគាត់ក៏បាននិទានរឿងកំប្លែងដដែលនោះប្រាប់ទៅពួកគេម្ដងទៀតហើយមានតែមនុស្សពីរបីនាក់ក្នុងចំណោមពួកគេតែប៉ុណ្ណោះបានញញឹម។

នៅពេលគាត់និយាយរឿងកំប្លែងដដែលនោះជាលើកទី 3 មិនមាននរណាម្នាក់សើចទេ។

បុរសដ៏ឆ្លាតវាងវៃនោះបានញញឹមហើយបាននិយាយថា អ្នកមិនអាចសើចហ្នឹងរឿងកំប្លែងដដែលបានទេដូច្នេះហេតុអ្វីបានជាអ្នកតែងតែត្អូញត្អែអំពីបញ្ហាដដែលៗ។

មេរៀន

ការបារម្ភមិនអាចដោះស្រាយបញ្ហារបស់អ្នកបានទេ វាមានតែធ្វើឱ្យអ្នកខ្ជះខ្ជាយពេលវេលានិងកម្លាំងតែប៉ុណ្ណោះ៕

ចំណាត់ក្រុម ៖សិក្សាភាសាអង់គ្លេស

លាហើយ​ការ​បង្រៀន

31 ខែសីហា 2019 មតិ 3

កើតមក​ជាមនុស្សមិនឆ្លាត មិន​វាងវៃ មិនក្លាហាន ធ្វើអ្វីចិត្តមិនដាច់ស្រេច ទើបធ្វើឲ្យ​ជីវិតខ្ញុំចេះ​តែដើរថយ​ក្រោយ មិន​ដែល​ស្គាល់​អ្វី ថា​រីកចម្រើន​នឹង​គេ។ គេ​ថា​ មិន​ត្រូវ​យក​ជីវិត​យើង​ទៅ​ប្រៀង​ធៀប​ហ្នឹង​ជីវិត​គេ​ទេ តែ​ចេះ​តែមើល​ទៅគេ ចេះ​តែ​ច្រណែនហ្នឹង​គេ។ ចេះតែ​ឆ្ងល់​ថា​​ ហេតុអ្វី​មើល​ទៅ​គេ​ ធ្វើ​អ្វី​ក៏ដូច​ជាជោគជ័យ (ដោយ​សា​រ​ឃើញគេ​រីករាយ​ហ្នឹង​អ្វីដែល​គេ​កំពុងធ្វើ) ខ្លួន​ឯង​ខំ​ណាស់​ដែរតែ​នៅ​តែ​ មិន​បាន​អ្វី​ជា​ដំុ​កំភួន​សោះ។ នេះប្រហែល​ជាកាលពីមុន ខ្ញុំធ្វើ​អ្វី​ដែល​ខ្លួន​មិន​ពេញ​ចិត្ត​ ទើប​កើត​ជាចិត្ត​បរាជ័យក្នុង​ជី​វិត។

ក្នុង​មួយ​ជី​វិតខ្ញុំ​ ប្រាថ្នា​ចង់​ធ្វើ​ខាង​វិស័យអប់​រំ​ជាពិសេស​ជា​គ្រូបង្រៀន។ ដប់​ឆ្នាំ​ជា​ង​មក​ហើយ​ដែល​ខ្ញុំធ្វើ​ជា​គ្រូ​បង្រៀន​ភាសា​អង់គ្លេស​ ហើយ​ក៏​មិន​ដែល​មាន​អារម្មណ៍ថា​នឿយ​ណាយ​នឹង​វាដែរ។ នៅ​ក្នុង​ចំណោម​មនុស្ស​ម្នា ខ្ញុំ​មិន​ចេះ​បូរបាច់កើត​ជា​ការ​សន្ទនាអីទេ គេ​សួរ​មួយម៉ាត់​ឆ្លើយ​មួយ​ម៉ាត់ គេ​សួរ​ច្រើន​ម៉ាត់ ក៏​ឆ្លើយ​តែ​មួយ​ម៉ាត់​ហ្នឹងដដែល។ តែ​ពេល​ម៉ោង​បង្រៀន​វិញ​ កុំ​តែ​ខ្លាច​សិស្ស​គ្មាន​ពេល​អនុវត្ត កុំ​អី​និយាយមួយ​ម៉ោង​ទល់​មួយ​ម៉ោង​និយាយឡើង​បែក​ពពុះមាត់​ស្គុល​ក៏មិន​អស់​ពាក្យ​និយាយ​ដែរ​។ តែ​ដោយ​សារ​កាលៈទេសៈបង្ខំ​ម្តង​ហើយ​ម្តង​ទៀត ដោយ​សារ​កត្តា​តម្រូវ​ការ​លុយ​កាក់​ចេះ​តែ​កើន​ឡើង​ ទើប​ចេះតែ​ធ្វើ​ឲ្យ​ខ្ញុំឃ្លាត​ពី​ការ​ងារ​ជាទី​ស្រលាញ់​របស់​ខ្ញុំម្តង​ហើយ​ម្តង​ទៀត ហើយ​ពេល​នេះ​ ខ្ញុំត្រូវ​បង្ខំ​ចិត្ត​ឈប់​ទាំង​ស្រុង​ពី​ការ​បង្រៀន​​ ដើម្បីស្វែង​រកការងារ​ដែល​នឹង​ទទួល​បាន​ចំណូល​ច្រើន​ជាង​នេះមក​ទ្រទ្រង់​គ្រួសារ។ ខ្ញុំ​ដឹង​ខ្លួន​ឯង​ថា ក្រៅ​ពី​បង្រៀន​ខ្ញុំ​មិន​មាន​ជំនាញ​ធ្វើ​អ្វីនោះទេ ព្រោះទាំង​ថ្នាក់​បរិញ្ញាប័ត្រ និង​ថ្នាក់​អនុ​បណ្ឌិត សុទ្ធតែ​ជា​អក្សរសាស្រ្តអង់គ្លេស។ បើនិយាយ​ពី​ការ​ដាក់​ពាក្យ​ធ្វើការ​វិញ​ កុំ​ថា​ឡើយ​ដាក់​ពាក្យ​ជំនាញ​ផ្សេង គ្រាន់​តែ​ជា​តួនាទី​ជា Head Teacher ក៏ធ្វើ​មិន​បាន​ដែរ។ នេះ​ក៏ព្រោះ​តែខ្ញុំ​ខ្សោយ​ទំនាក់​ទំនង​ហ្នឹង​ឯង ហើយ​ជំនាញទំនាក់ទំនង​ហ្នឹង​ទៀត​សោត ទៅ​ណា​ក៏គេ​ត្រូ​វការ​វា​ដែរ ដែល​ភាសា​អ្នក​ស្វែង​រក​ការងារ​គេ​ថា មក​ពីខ្ញុំមិន​ចេះលក់​ខ្លួន អត់​ចេះប្រូ បទពិសោធន៍ការងារយ៉ាង​ម៉េច និយាយ​អញ្ចឹង សរសេរ​ក្នុង​ CV អញ្ចឹង មិន​ចេះបញ្ចេញបញ្ចូល។ មនុស្ស​ដែល​ចេះ​តែ​និយាយត្រង់​ៗ មក​ឲ្យ​និយាយ​បញ្ចេញ​បញ្ចូល មិន​ចេះទេ (មិ​ន​មែន​ថា​មិន​ចេះ និយាយ​កុហកទេ តែត្រូវការ​ពេល​ហ្វឹកហាត់) :)។

សរុប​សេចក្តី​ទៅ​ ខ្ញុំ​មាន​អារម្មណ៍ថា​ខ្លួន​ឯង​មិន​ជោគជ័យ ដោយ​សារ​ត្រូវធ្វើអ្វីដែល​ខ្លួន​មិន​ស្រលាញ់ ទោះបីជាការងារ​ខ្ពស់​ជាង​មុនបន្តិច ហើយ​ទៅ​ថ្ងៃមុខ​ការងារនេះនឹង​ជួយ​ឲ្យ​ខ្ញុំបាន​ចំណូល​ច្រើន​ជាង​មុន និង​មាន​មុខមាត់​ជាង​មុនបន្តិច (ពេល​ជួប​មិត្តភ័ក្រ្ត​ អាច​អួត​គេ​បាន) តែ​ឲ្យ​តែ​ខុស​ពីការ​បង្រៀន គឺ​មិន​នៅតែពេញ​ចិត្ត៕

ការដាក់​ទោស​របស់​ប្រទេស​មួយ​ចំនួន​ទាក់​ទង​នឹង​បទ​ល្មើលរំលោភ

បទល្មើស​រំលោភ​បាន​ក្លាយ​ជា​ប្រធានបទ​រសើប​មួយ​ក្នុង​ប្រទេស​កម្ពុជា​យើង។ ដោយ​សារ​ប្រទេ​ស​យើង​មិន​មាន​ច្បាប់​ប្រហារ​ជីវិត​សម្រាប់​ដាក់​ទៅ​លើ​ជន​ល្មើស​ ដូច្នេះ ការ​ដាក់​ពន្ធធនាគារ​ជា​ទោស​តែ​មួយ​គត់់សម្រាប់​ចោទ​ទៅ​លើ​ជន​ល្មើស។ ដោយឡែក​ យើង​ក្រឡេក​ទៅ​មើល​ប្រទេស​មួយ​ចំនួន​ដែល​មាន​ច្បាប់​តឹងរឹង​ទៅ​លើ​បទ​ល្មើស​រំលោភ​នេះ៖

១ ប្រទេសឥណ្ឌា

បន្ទាប់ពីច្បាប់ប្រឆាំងការរំលោភក្នុង​ខែមេសាឆ្នាំ២០១៣ ជនល្មើសនឹងត្រូវជាប់ពន្ធ​ធនាគារ​មួយជីវិត (ឬ១៤ឆ្នាំ អាស្រ័យលើអាយុជាក់ស្តែងរបស់ជនល្មើល) ឬទោស​ប្រហារ​ជីវិត​ក្នុង​ករណីធ្ងន់ធ្ងរមួយចំនួ​ន។

២ ​ប្រទេស​បារាំង

ប្រទេសបារាំង​នឹង​ដាក់​ជន​លើ្មស​អោយ​ជាប់​ពន្ធធនាគារ ១៥ឆ្នាំ សំរាប់​បទល្មើស​​រំលោភ ឬអាច​រហូតដល់​៣០ឆ្នាំ ឬមួយ​ជីវិត​អាស្រ័យ​លើ​ទង្វើរនិង​ភាពឃោរឃៅ​នៃ​សកម្មភាព។

៣ ប្រទេសកូរ៉េ​ខាង​ជើង​

ជនល្មើស​របស់​ប្រទេស​កូរ៉េ​ខាង​ជើង​នឹង​ត្រូវ​បាញ់​សម្លាប់​ដោយ​​ក្រុម​ពេជឃាត​ជា​ការ​ដាក់​ទោស​សម្រាប់​បទ​ល្មើស​រំលោភ។

៤ ប្រទេស​ចិន

នៅ​ប្រទេស​ចិន​ មាន​ការ​ដាក់​ទោស​យ៉ាង​ធ្ងន់​ធ្ងរ​ទៅ​លើ​ជនល្មើស​ប្រភេទ​នេះ។ បទល្មើស​រំលោភ​ត្រូវ​បាន​ចាត់​ទុក​ជា​ទង្វើ​យង់​ឃ្នង​បំផុត​ ហើយ​ការ​ដាក់​ទោស​ប្រហារ​ជីវិត​ត្រូវ​បាន​អនុវត្ត​នៅ​ពេល​ជនល្មើស​ត្រូវ​បាន​ចោទ​ប្រកាន់​។ ការប្រហា​រ​ជីវិត​នេះ​នឹង​ត្រូវ​ធ្វើ​ដោយ​ការ​បាញ់​មួយ​គ្រាប់​លើ​កញ្ចឹង​ករ។ ទោស​មួយ​ទៀត​ទៅលើ​ជន​ល្មើស​គឺការ​ក្រៀវ។

៥ ប្រទេសសោឌីអារ៉ាបៀ

ប្រទេស​នេះ​ក៏​មាន​ច្បាប់​តឹង​រឹង​ក្នុង​ការ​ដាក់​ទោស​ជនល្មើស​ពី​បទ​រំលោភ។ ជនល្មើស​នឹង​​ត្រូវ​ដាក់​ថ្នាំ​សណ្តំហើយ​កាត់​ក្បាល​នៅ​ទី​សាធារណៈក្នុង​ថ្ងៃដែល​ត្រូវ​បាន​ចោទ។

៦ ប្រទេស​អេហ្សីប

ប្រទេស​អេហ្សីប​ក៏ចាត់​ទុក​ទោស​រំលោភ​ថា​ជា​ករណី​ធ្ងន់​ធ្ងរ​ដែល​មិនអាច​លើក​លែង​បានដោយជនល្មើស​នឹង​ត្រូវ​ព្យួរ​ក។

៧ ប្រទេស​អ៊ីរ៉ង់

ប្រទេស​អ៊ីរ៉ង់​ក៏​មាន​ទោស​ប្រហារ​ជីវិត​សម្រាប់​ជន​ដែល​ប្រព្រឹត្តបទល្មើស​រំលោភ​ដែរ។ ប៉ុន្តែជួន​កាល​ប្រសិន​បើ​ជនរងគ្រោះ​ព្រមទទួល​សំណង​នោះ ជន​ល្មើស​អាច​នឹង​មាន​ទោស​ត្រឹម​តែ​ជាប់​ពន្ធ​ធនាគារ ឬអា​ច​រួច​ខ្លួន​ដោយ​ការ​វាយ​នឹង​១០០​ខ្សែ​តី​ប៉ុណ្ណោះ។

៨ អ៊ីស្រាអែល

ការដាក់​ពន្ធធនាគារ​រយៈពេល​១៦ឆ្នាំ ឬអាច​នឹង​មួយ​ជីវិតនឹង​ត្រូវ​បាន​ផ្តល់​អោយ​ជន​ល្មើស។

៩ ប្រទេស​ណរវ៉េ

រាល់​សកម្មភាព​ទៅលើ​ស​ផ្លូវភេទ​ដោយ​មិន​មាន​ការ​ព្រមព្រៀង​គ្នា​រវាង​ភាគី​ទាំង​សង​ខាង​នឹង​ត្រូវ​ចាត់​ទុក​ថា​​ជា​បទ​ល្មើស​រំលោភនៅ​ប្រទេ​ស​ណរវ៉ែ​។ ជន​ល្មើស​នឹង​ត្រូវ​ដាក់​ទោស​​ពី​ ៤ទៅ ១៥​ឆ្នាំ​​អាស្រ័យ​លើស​ទង្វើ​របស់​ខ្លួន​។

១០ ប្រទេសអាហ្គានីស្ថាន

ករណី​រំលោភ​គឺ​កម្រ​មាន​ណាស់​នៅ​ប្រទេ​ស​នេះ ដោយ​សារ​តែ​ជនល្មើស​នឹង​ត្រូវ​បាញ់ចំក្បាលឬព្យួរក​ក្នុង​រយៈពេល​បួន​ថ្ងៃ​បន្ទាប់​ពី​ការ​សម្រេច​ទោស។

១១ សហរដ្ឋអាមេរិច

សហរដ្ឋអាមេរិចមាន​ច្បាប់​ពី​រគឺ​ច្បាប់​រដ្ឋ និង​ច្បាប់​សហព័ន្ធ។ ប្រសិន​បើ​ជនល្មើស​ត្រូវ​បាន​ចោទ​ប្រកាន់​​ដោយ​ច្បាប់​សហព័ន្ធ ជន​នោះ​នឹង​ត្រូវ​ជាប់​ពន្ធ​ធនាគារ​មួយ​រយៈ ឬមាច​ដល់​មួយ​ជីវិត។

១២ ប្រទេស​រុស៊ី

ប្រទេស​រុស៊ី​មិ​ន​មាន​ច្បាប់​ប្រហារ​ជីវិត​​ទៅ​លើ​ជនលើ្មស​ដែ​ល​ប្រ​ព្រឹត្ត​បទល្មើស​រំលោភ​នោះ​ទេ។ ជនល្មើស​នឹង​ត្រូវ​ជាប់​ពន្ធធនាគារពី ៣ ទៅ៤ឆ្នាំ ឬ ១០​ ទៅ​២០​ ឆ្នាំ​អាស្រ័យ​លើ​ទំហំ​នៃ​បទល្មើស៕

ចំណាត់ក្រុម ៖សិក្សាភាសាអង់គ្លេស

សាកសពបុរសដែលស្លាប់ដោយសារមើលរឿង The Conjuring 2 បានបាត់

កាសែត Times of India បានរាយការណ៍ថា បុរសវ័យ 65 ឆ្នាំម្នាក់ Tiruvannamalai បានស្លាប់នៅឯមហោស្រព ដោយជំងឺគាំងបេះដូង ក្នុងអំឡុងពេលមើលខ្សែភាពយន្តរន្ធត់ The Conjuring 2  ដែលកំពង់តែពេញនិយម។ ប៉ូលិសបាននិយាយថា អ្នកគាត់បានត្អូញត្អែរពីការឈឺចាប់ទ្រូង ហើយក៏ដួលសន្លប់។ពេលបញ្ជូនទៅកាន់មន្ទីរពេទ្យ បុរសនេះនឹងត្រូវបានប្រកាសថាបានស្លាប់ហើយ។ អ្វីដែលជារឿងមិនធម្មតាបានកើតឡើងបន្ថែមទៀតបន្ទាប់ពីនោះ។

សាកសពរបស់បុរសនេះ ត្រូវបានបញ្ជូនទៅ មន្ទីរពេទ្យ មហាវិទ្យាល័យ វេជ្ជសាស្រ្ត របស់រដ្ឋាភិបាល Tiruvannamalai សម្រាប់ធ្វើកោសល្យវិច្ច័យ ប៉ុន្តែគេមិនដែលបានឃើញសាកសពមកដល់គោលដៅនោះទេ។ ទាំងសាកសពនិងអ្នកបើកបរបានបាត់ខ្លួន ។ ប៉ូលីសកំពុងតែព្យាយាមស្វែងរកមូលហេតុនៃការបានខ្លួននេះ។

វិធីថែរក្សាទំនាក់ទំនងឲ្យបានយូរអង្វែង

8 ខែ​កុម្ភៈ 2016 បញ្ចេញមតិ

 

១. កាយនិងចិត្តត្រូវក្បែរគ្នា

មើលទៅដូចជាមិនពិបាកទេ តែស្ថិតក្នុងសម័យដែលមានការរីកចម្រើន​ខាងទំនាក់ទំនងបន្ទាន់ និង​ដំណឹងខ្លីៗដែល​បញ្ជូនតាម​ទូរស័ព្ទឥតឈប់ឈរពីបណ្តាញសង្គមផ្សេងៗនោះ ការផ្តោតអារម្មណ៍ទៅលើដៃគូរអ្នកហាក់​ដូច​ជា​ពិបាកបន្តិចហើយ។ តើញឹកញាប់ទេដែលដៃគូរបស់អ្នក​ជជែកជាមួយអ្នក តែអ្នក​បែរជាស្រាប់​តែនឹកឃើញថា​ អ្នក​មិន​បានឆែក Facebook មួយព្រឹកហើយ​យក​មក​ឆែក​ភ្លាម​ៗ​ដោយ​បណ្តោយ​ឲ្យ​ដៃគូរបស់​អ្នក​ហាក់​ដូច​ជា​កំពុងតែ​និយាយ​តែម្នាក់​ឯង​ព្រោះ​អារម្មណ៍​អ្នក​មិន​នៅជាមួយ​គាត់? ដើម្បីបញ្ជាក់ថា​អ្នក​ពិតជានៅជាមួយ​គាត់​ អ្នក​ត្រូវ​តែ​នៅ​ទាំងកាយទាំងចិត្ត។ និយាយរូម​គួរផ្តោត​ទៅលើ​ការសន្ទនារជាមួយ​ដៃគូរបស់​អ្នក​ជាជាង​ការយកចិត្តទុកដាក់ទៅលើ​ដំណឹងដែល​លោតមក​ក្នុង​ទូរស័ព្ទរបស់​អ្នក​ដែល​អ្នក​អាច​ឆែក​ពេល​ណា​ក៏បាន។

២. ត្រៀមខ្លួនទទួលការលំបាក

គ្រាន់​តែ​ស្រលាញ់គ្នា​មិន​មាន​ន័យ​ថា​អ្នក​បាន​តាំងចិត្ត​ថា​នៅជាមួយ​គ្នា​ដោយ​មាន​សុភមង្គលនោះទេ។ ការ​រក្សាទំនាក់​ទំនង​ឲ្យបាន​យូរ​អង្វែង​ទាមទារនូវ​ការអត់​ធ្មត់​ជា​ច្រើន​។ មានន័យ​ថា​ ថ្ងៃណាមួយ​ដៃគូររបស់​អ្នក​អាច​នឹង​ធ្វើ​ឲ្យ​អ្នក​ឈឺចាប់​យ៉ាងខ្លាំង​រហូត​ធ្វើឲ្យ​អ្នក​មាន​អារម្មណ៍​ថា​មិន​អាច​បន្តទៅ​ទៀត​បាន​ ប៉ុន្តែ​បើ​អ្នក​ទាំង​ពីរ​ដឹងជាមុន​ថា​ការ​នៅ​ជាមួយ​អាច​នឹង​ជួប​ការ​លំបាក ហើយ​យល់​ពី​តម្លៃ​របស់គ្នា​ទៅ​វិញ​ទៅ​មក នោះ​អ្នក​នឹង​មិន​មាន​ការលំបាក​ក្នុង​ការ​បន្ត​ទំនាក់​ទំនងនោះទេ។

៣. ភាពស្និតស្នាល

ក្រៅពីការចំណាយ​ពេល​វេលានៅក្បែរគ្នា​ អ្នក​គួរ​ស្វែង​យល់​ថា​តើ​ដៃគូរបស់​អ្នក​ត្រូវការ​ភាពស្និតស្នាល​បែប​ណា​ជាមួយ​អ្នក​។ សម្រាប់​គូសង្សារកាយវិការមួយ​ចំនួន​​ត្រូវបានកំណត់​ដោយ​ទំនៀមទំលាប់ តែ​មួយ​ចំនួន​ទៀត​ត្រូវ​បាន​កំណត់​ដោយ​ដៃគូរបស់​ផ្ទាល់​ នេះជាអ្វីដែល​អ្នក​ត្រូវ​ស្វែង​យល់​។ សម្រាប់​ប្តីប្រពន្ធគួរស្វែងយល់​ពី​តម្រូវ​ការ​នៃ​ភាព​ស្និតស្នាល​រវាងគ្នា​និង​គ្នា តើដៃគូរបស់អ្នក​ត្រូវ​ការ​របៀបណា?

៤. បង្កើន​ភាពរីករាយ

ប្រសិន​បើអ្នក​គ្រាន់តែចំអិន​ម្ហូប​ មើលទូរទស្សន៍ រួចចូលគេង​នោះ មិន​យូរមិន​ឆាប់​អ្នក​នឹង​មាន​អារម្មណ៍​ធុញ​ទ្រាន់។ ចូរស្វែងរក​អ្វីដែលថ្មី​ៗ​ដើម្បី​ឲ្យ​ដៃគូរបស់​អ្នក​មាន​ភាពរីករាយ​ និង​ភ្ញាក់​ផ្អើល​ដោយ​សកម្ម​ភាព​ផ្សេងៗ​ពេល​គាត់​នៅជាមួយ​អ្នក។ បន្ទាប់​ពី​ញ៉ាំអាហារពេលល្ងាចរួច​គួរចេញទៅក្រៅ​មើលកុន មើលតន្រ្តី ឬទៅ​រមនីយដ្ឋាននានានៅចុងសប្តាហ៍។

៥. ចងចាំអនុស្សាវរីយ៍ល្អៗ

មិន​ខុសពីពាក្យ​ចាស់​បុរាណ​របស់​ខ្មែរយើង​ដែលថា​ ឃ្លានឆ្ងាញ់ស្រលាញ់ល្អនោះទេ ពេល​អ្នក​ស្រលាញ់គ្នា​ដំបូង​ អ្នក​បាន​ផ្តោត​ទៅ​លើ​តែ​ចំណុចវិជ្ជមាន​របស់​គាត់។ អ្នក​មាន​អារម្មណ៍ស្រលាញ់ងុប​នឹង​សមត្ថភាពផ្នែកតន្រ្តី​របស់​គាត់​ ឬក៏យោបល់ផ្សេង​ៗទៅលើចំនុចខ្វះខាតរបស់អ្នក​។​ តែមួយរយៈកន្លងមក​ សមត្ថភាពក៏ដូចជាយោបល់ទាំងនេះក៏ប្រែ​ជាធម្មតាគួរឲ្យធុញ​ពីព្រោះអ្នក​បាន​ចាប់​ផ្តើម​ស្វែងយល់​ពី​ចំនុចអវិជ្ជមាន​របស់​ដៃគូអ្នក​កាន់​តែច្រើន​ទៅៗ។ ជាពិសេស​នៅ​ពេលឈ្លោះប្រកែកគ្នា អ្នក​ត្រូវ​ទទួលស្គាល់ថា​ចំនុចល្អណាខ្លះ​ដែលអាច​យកប៉ះប៉ូវ​នូវ​ចំនុចអវិជ្ជមាននេះ​ឬចំនុចខ្វះខាតទាំងនោះ ចាប់​ផ្តើម​រំលឹក និងឲ្យ​តម្លៃ​ទៅ​អនុស្សាវរីយ៍​ដែល​មាន​កន្លងមក​ជាជាង​ការ​គាស់​កកាយ​អ្វី​ដែល​នាំឲ្យ​ល្អកកករ។ ការផ្តោតទៅលើចំនុចល្អៗរបស់​ដៃគូគឺជាកត្តាដ៏សំខាន់​​សម្រាប់រក្សាទំនាក់ទំនង​ឲ្យ​បាន​យូរ​អង្វែង។

តើអ្នក​មាន​អ្វីចង់​បន្ថែមទេ? សូមចូលរួមចែករំលែកទាំងអស់គ្នា!!!

វិន័យទាំង៧ក្នុងជីវិត

បេីអាចធ្វើបាន ជារឿងល្អបំផុត តែខ្ញុំគិតថាកម្រនឹងមានមនុស្សអាចធ្វើបានណាស់ ដោយសារវិន័យមួយ​ចំនួន​គឺ​ស្ថិតជាប់នឹងការគិតរបស់យើងមិនងាយនឹងយកចេញបាន។ តែឆ្លងតាមការប្រឈរមុខនឹងបញ្ហាកន្លងមក​នេះ​ខ្ញុំ​អាច​អភិវឌ្ឍខ្លួន​បាន​​ច្រើនដែរនៅសល់តែចំនុចទី​១ និងទី៥ទេ។ ចុះអ្នកទាំងអស់គ្នាវិញអាចធ្វើបានប៉ុន្មាន​ចំនុច​​ហើយ? ខ្ញុំសុំបកស្រាយត្រួសៗ ខ្លីៗទាក់ទងនឹង​ចំនុចទាំង៧នេះ

  1. កុំគិតពីរឿងអតីតកាលដែលមិន​អាច​ប្តូរបានទើបមិន​ប៉ះពាល់ដល់បច្ចុប្បន្នរបស់យើង
  2. អ្វីដែលគេគិតពីយើង វាមិន​ទាក់ទងនឹងយើងនោះទេ ឲ្យ​គេ​គិតអី​គិតទៅ
  3. ពេលវេលាអាចជួយយើងព្យាបាលគ្រប់រឿងទាំងអស់ ដូចច្នេះប្រគល់រឿងទាំងអស់​ឲ្យ​ពេលវេលាចុះ​
  4. កុំប្រៀបធៀបខ្លួនឯងនិងអ្នកដទៃ កុំវាយតម្លៃអ្នកដទៃ យើងមិន​ដឹង​ថាគេ​បាន​ឆ្លង​កាត់​អ្វីខ្លះនោះទេ
  5. ឈប់គិតច្រើន។ ចម្លើយទាំងអស់នឹងមករកយើងដោយខ្លួនឯងនៅពេលយើងលែងរំពឹងវា
  6. សុភមង្គលរបស់យើងគឺឋិតនៅលើយើងខ្លួន​ឯង
  7. ត្រូវញញឹម។ បញ្ហាទាំងអស់មិន​មែនយើងត្រូវដោះស្រាយតែឯងនោះទេ។

7 Cardinal Rules in Life

ពាក្យសន្យា និងការគោរពាក្យសន្យា

ការសន្យាមាន​ច្រើន​ប្រភេទ៖ សន្យារឿងស្នេហា សន្យារឿងពេលវលា សន្យារឿងទិញវត្ថុឲ្យ​គ្នា សន្យាសងលុយ​ជាដើម។

សន្យា​រឿង​ស្នេហាថាស្រលាញ់គ្នា​ដល់​ចាស់​ស្លាប់​មិន​ក្បត់​គ្នា បើម្ខាង​ណា​លួចលាក់​មាន​អ្នក​ថ្មី អ្នក​នោះ​ជាអ្នក​ក្បត់​សន្យា​។ ភាគរយ​ដែល​អាច​គោរព​ពាក្យ​សន្យា​ គឺ​១០០% ព្រោះវាស្ថិតនៅលើចិត្ត។

សន្យារឿងពេលវេលាថា​មក​ឲ្យ​ទាន់ បើ​អ្នក​ណា​មក​យឺត​ ចាត់​ទុក​ថា​មិន​គោរព​ពាក្យ​សម្តី មិន​គោរព​សន្យា។ ភាគរយ​ដែល​អាច​គោរព​ពាក្យ​សន្យា​បាន​គឺ​ ១០០% អោយ​តែ​បាន​ត្រៀម​ខ្លួន​ជាមុន​នឹង​មិន​មក​យឺត​ទេ បើមក​យឺត​គឺ​មក​ពី​មើលងាយ​ពេល​វេលា ឬអ្នក​ដែល​ត្រូវ​គេ​សន្យាមិន​សំខាន់។

សន្យា​រឿង​ទិញវត្ថុឲ្យ​គ្នា វាមិន​សំខាន់​ថា​ អ្នក​នោះ​មាន​ចិត្ត​ចង់​ទិញ​ឬមិន​ចង់​ទិញ​នោះ​ទេ បើ​គេ​មិន​ចង់​ទិញឲ្យ​ គេ​មិន​សន្យា​នោះទេ តែ​អ្វីដែល​សំខាន់​គឺលុយ។ ពេល​ដែល​គេ​សន្យា​ គេគិត​ថា​គេ​មាន​លុយ​អាច​ទិញឲ្យ​បាន តែ​ដល់​ពេល​នោះ​គេ​អាច​នឹង​គ្មាន​លុយដោយ​ប្រការ​ណា​មួយ។ យើង​ត្រូវ​មើល​លើ​ស្ថាន​ភាព​ជាក់​ស្តែង។ ភាគរយ​នៃ​ការ​គោរព​ពាក្យ​សន្យា​គឺ​ ៥០%លើចិត្ត និង​៥០%​លើលុយ។

សន្យា​ថា​សង​លុយ​ ក៏​មិន​ខុស​ពី​ករណីទិញ​របស់​របរ​ឲ្យ​គេ​ដែរ យើង​ត្រូវ​មើល​លើ​ស្ថា​ន​ភាព​ជាក់​ស្តែង​ថា​ អ្នក​នោះ​មាន​សមត្ថភាព​សងតែ​មិន​សង​ ឬ​​គ្មាន​សមត្ថភាព​សងពិត​ប្រាកដ។ ខ្ញុំ​អាច​កំណត់​អត្រា​ថា​ ៥០/៥០ ព្រោះ​វា​មិន​ឋិតនៅលើ​ចិត្តចង់សង​តែ​ម្ខាង​នោះ​ទេ​ គឺ​ឋិត​នៅ​លើទឹក​លុយ​ថា​មានឬ​អត់។ ចង់​ដឹង​ថា​មាន​ ឬក៏អត់​គឹយើង​ត្រូវ​ធ្វើការ​តាម​ដានសកម្មភាព​ថា​អ្នក​ជំពាក់​បំណុលយើង​នោះ​ពិត​ជា​មាន​តែមិន​ព្រម​សង ឬមួយ​គេ​ពិត​ជា​អត់​មែន។

ចំណាត់ក្រុម ៖ផ្សេងៗ, វាចារខ្ញុំ ស្លាក:
%d bloggers like this: